“Сез, чыннан да, Тыгинмы?”: баш инспектор ИКне ничек фаш иткән
Татарстанның баш торак инспекторы Александр Тыгинга кабул итүгә Казан шәһәренең Короленко урамындагы 67 нче йортта яшәүче хатын-кыз килгән. Хатын-кыз сүзләренчә, түбәгә күп еллар су үтә, ә идарәче компания чаралар күрми.
“Кая гына шалтыратмадык, кая гына язмадык! “Ачык Казан”да да, ЖЭУда да - барысы да файдасыз”, - дип зарланды мөрәҗәгать итүче.
Татарстанның Торак инспекциясе теләсә нинди сораулар булганда идарәче компаниянең авария-диспетчерлык хезмәтенә турыдан-туры мөрәҗәгать итәргә киңәш итә. Шалтыратуга диспетчер 5 минут эчендә җавап бирергә яки 10 минут эчендә шалтыратырга тиеш. Аннары заявканы теркәргә, аның номерын, үтәү датасын һәм вакытын хәбәр итәргә.
Кабул итү вакытында ук “Вектор Казан” идарәче компаниясенең АДСына шалтыратырга булдылар. Шунысын да билгеләп үтәргә кирәк, ИК директоры шулай ук кабул итүдә булган, ә диспетчер белән сөйләшү тавыш элемтәсе буенча барган.
АДСка шалтыратуга оператив җавап бирделәр, әмма диспетчерның җавабы федераль законнарны бозды: “17:00 гә кадәр языгыз һәм “Ачык Казан”га шалтыратыгыз, ә 17:00 дән соң инде безгә!!!”.
“Ә сез гариза бирүчеләрне нинди нигездә күчерәсез?” - дип сүзгә кушылды Александр Тыгин һәм үзе белән таныштырды.
Диспетчер шундук трубканы үзенең җитәкчесенә бирде. Ул подряд оешмасы җитәкчесе булып чыкты.
“Сез, чыннан да, Тыгинмы? Бездә мондый тәртип: заявкаларны 17:00 сәгатьтән соң гына кабул итәбез”, - дип җавап бирде ЖЭУ башлыгы.
Һәм хәзер инде идарәче компания директорына сорау: авария хезмәте эше подрядчикка нинди нигездә тапшырылган? Гаризалар нинди нигездә теркәлми?
Закон буенча һәр идарәче компания яки ширкәт АДС оештырырга яки чит авария хезмәте белән килешү төзергә тиеш.
Идарәче оешмалар өчен АДС оештыру вариантлары:
- Үз хезмәте - АДС ИК структурасына керә. Плюслары: турыдан-туры контроль, проблемаларга тиз реакция. Минуслар: штатка һәм җиһазларга югары чыгымнар.
- Аутсорсинг - ИК диспетчерлык хезмәте күрсәтү өчен чит компанияне яллый. Плюслары: чыгымнарның кимүе, кадрлар проблемаларының булмавы. Минуслар: эш сыйфатын контрольдә тотуны югалту куркынычы.
Шунысы мөһим: АДС аутсорсингка тапшырылган булса да, анда яшәүчеләр һәм күзәтчелек органнары алдында җаваплылык идарәче оешмада кала.
Иң мөһиме, АДС тәүлек буе халык гаризаларын кабул итәргә тиеш: торба шартлау яки су агып чыгу; канализация яки чүп үткәргеч чүпләнү; электр белән бәйле өзеклекләр; җылыту белән бәйле проблемалар; сыйфатсыз су (тутыккан, болганчык); лифт эшендәге җитешсезлекләр; подъезддагы яктыртудагы җитешсезлекләр.
Моннан тыш, АДС йорттагы барлык инженер системаларының: су белән тәэмин итү, җылыту, электр, канализация эшен контрольдә тотарга тиеш.
Тикшерү йомгаклары буенча “УК “Вектор Казань” ҖЧҖ аккан түбә һәм АДС эше өчен дә җаваплы булачак.
Татарстан Торак инспекциясе матбугат хезмәте