Чаллы кешесе фатирны яңадан планлаштырган өчен штрафка тартылды
Автокала кешесе лоджия хисабына торак мәйданын арттырган: фасад диварының бер өлешен, бүлмәара диварларны сүткән, электр һәм җылылык белән тәэмин итү системасына үзгәрешләр керткән.
Татарстанның Торак инспекциясенә Комсомол яр буе урамындагы 28 нче йортта яшәүчеләрдән һәм идарәче компаниядән фатирларның берсен яңадан планлаштыру турында күмәк мөрәҗәгать килде.
Тикшерү барышында фактлар расланды. Яңадан планлаштыру үз белдеге белән башкарылган. Башкарма комитетта килештерелмәгән.
Әйе, ламинат яки линолеум белән капланган идән – милекче милке. Обойлар ябыштырылган стеналар да шулай ук. Ләкин өслек җәелгән панельләр үзләре – гомумйорт милке. Терәк диварлар җимерелү генә җитмәгән, башка милекчеләрнең хокуклары да бозылган.
Россия Хөкүмәтенең 491 номерлы карарының 2 пункты нигезендә гомуми мөлкәт составына күпфатирлы йорттагы бүлмәләр генә түгел, ә фундамент, терәк диварлар, түшәмә плитәләре, балкон һәм башка плитәләр, терәк колонналар һәм киртәләп торучы башка терәк конструкцияләр һ.б. керә.
Торак кодексы нигезендә (36 ст. 3 п., 40 ст. 2 п.) гомуми мөлкәт күләмен киметү йорттагы барлык милекчеләрнең ризалыгы белән генә, шул исәптән биналарны реконструкцияләгәндә, үзгәртеп корганда, яңадан планлаштырганда гына мөмкин.
Шулай итеп, тәрәзәне сүтү реконструкция булып тора һәм гомуми милекне киметүгә китерә, димәк, күршеләрнең ризалыгы кирәк. Әмма шарт бар – моңа Башкарма комитет комиссиясенең рөхсәте булырга тиеш.
Тәрәзәне, сантехниканы килештермичә генә алмаштырырга була, тәрәзәне, ишекне, стеналарны һ.б. күчерү өчен килештерү кирәк. Ремонт вакытында төп кагыйдә — фатирның төп конструкциясен үзгәртмәү.
Чаллы кешесе законнарны бозган, шуның өчен административ җаваплылыкка тартылды, 2 500 сум штраф билгеләнде. Эш моның белән генә чикләнмәячәк – алга таба Идарәче компания һәм Башкарма комитет эшләячәк.
Татарстан Торак инспекциясе матбугат хезмәте