ТТК рәисенә «рәхмәт»: милекчеләргә 10 ел өчен түләүләрне яңадан исәпләп чыгарырга мөмкиннәр
Казан йортында яшәүчеләргә капиталь ремонт фондына күчерелә торган түләүләргә өстәмә түләү исәпләргә мөмкиннәр. Бертуган Касыймовлар урамындагы 76 нчы йорт милекчеләре бервакыт 10 елга исәпләнгән квитанция алачак. Берьюлы бер квитанциядә. Сәбәбе – «Спартак-24» торак-төзелеш кооперативы рәисе махсус банк счеты торышы турындагы мәгълүматны яшерә.
Татарстан Торак инспекциясе йортларга капиталь ремонт ясау өчен билгеләнгән махсус счетларның торышын тикшерә. Аларның хуҗаларына мәгълүмат бирү турында гаризалар җибәрелә. Әлеге кооперативның рәисе күзәтчелек органы таләбен игътибарсыз калдырды: милекчеләр кертемнәрне махсус счетта кичектерергә карар кылган гомуми җыелыш беркетмәсен, счетның торышы һәм тупланган сумманың күләме турындагы белешмәләрне һ.б. бирмәде.
Эш материаллары судка тапшырылды, кичә җәмәгать суды мәгълүматны яшергән өчен ТТК рәисен кисәтү рәвешендә административ җаваплылыкка тартты. Алга таба, әгәр документлар бирелмәсә, рәис өчен катгыйрак җәза булачак, ә йортны регоператорның «гомуми казанына» күчерәчәкләр. Өстәвенә, 10 ел өчен өстәмә түләүләр дә исәпләнәчәк, чөнки күпме акча җыелганлыгы, җыелганмы – билгеле түгел. Бәлки, яшәүчеләр намус белән түләп барганнардыр. Ләкин мәгълүмат юк. Сарыф ителгәнме? Әгәр шулай икән, кире кайтарырга кирәк. Бу кертемнәр йортны капиталь ремонтлауга гына каралган. Максатсыз файдалану очраклары еш була: торак-коммуналь хезмәтләр, юристлар хезмәтләре өчен түләү, суд чыгымнары һ.б.
Регоператорга күчерү исемлегендә 47 күпфатирлы йорт бар. Ягъни берничә мең милекче ширкәтләр рәисләре һәм идарәче компанияләр гаебе белән саллы счетлар алырга мөмкин.
Татарстанның Торак инспекциясе татарстанлыларга махсус счетның торышын тикшереп торырга киңәш итә. Сезнең таләпләр буенча счет ачылган банк барлык операцияләр турында мәгълүмат бирергә тиеш. Гаризага милек хокукын раслый торган документны теркәп куярга кирәк.
Үз тупланмаларыгызны контрольдә тоту сезнең акчаны максатчан файдаланмаудан саклаячак.
Татарстан Торак инспекциясе матбугат хезмәте