Балалар мәйданчыгында тәмәке тарту өчен административ җаваплылык

Чаллы районара торак инспекциясе гражданинны Чаллы шәһәренең Комсомол районы полиция бүлегеннән килгән материаллар буенча балалар мәйданчыгында тәмәке тарткан өчен административ җаваплылыкка тартты.

Административ эш материалларыннан күренгәнчә, Чаллы шәһәренең Сергей Есенин тыкрыгындагы 4 номерлы күпфатирлы йортның балалар мәйданчыгы территориясендә гражданин тәмәке тарткан, шуның белән Административ хокук бозулар турында кодексның 6.24 ст. 2 өлешендә каралган административ хокукны бозган.

Күпфатирлы йортларның гомуми файдалану урыннарында, шулай ук коммуналь фатирлардагы бүлмәләр хуҗаларының гомуми милкен тәшкил итүче биналарда тәмәке тарту тыела.

Закон таләпләрен бозган өчен 500 сумнан 1500 сумга кадәр штраф рәвешендә административ җәза каралган (Административ хокук бозулар турында РФ кодексының 6.24 ст. 1 өлеше).

Федераль законда билгеләнгәнчә балалар мәйданчыкларында тәмәке тартуны тыю таләбен бозу гражданнарга карата ике меңнән өч мең сумга кадәр административ штраф салуга китерә.

Мондый хокук бозулар турында эш кузгатырга полиция хезмәткәрләре вәкаләтле.

 Чаллы районара торак инспекциясе вәкаләтләренә аерым территорияләрдә, шул исәптән күпфатирлы йортларның балалар мәйданчыклары территориясендә тәмәке тарту өчен административ эшләрне карау керә.

Күрсәтелгән административ эшне карау нәтиҗәләре буенча, Чаллы районара торак инспекциясе  балалар мәйданчыгы территориясендә тәмәке тарткан өчен 2000 сум күләмендә административ штраф билгеләү турында карар кабул итте.

Карар мәҗбүри үтәү өчен суд приставлары хезмәте бүлегенә җибәрелде, чөнки административ штрафны түләү турында документ алынмады.