Кайнар су белән тәэмин итүчегә нормативларны бозган өчен штраф салынды
Татарстанның Торак инспекциясе бөгелмәлеләрнең салкын кайнар суга карата шикаятьләре буенча тикшерүгә йомгак ясады. Вахитов урамындагы 11 нче йортта яшәүчеләр “Бөгелмә җылылык челтәрләре предприятиесе” АҖ белән кайнар су белән тәэмин итү турында турыдан-туры килешүләр төзегәннәр һәм температура режимын системалы рәвештә бозу белән очрашканнар.
Тикшерү узган елның сентябреннән аларның краннарында кайнар су температурасының билгеләнгән нормаларга туры килмәвен ачыклаган. Шунысы игътибарга лаек, хезмәт күрсәтүче үзе проблема турында белгән, чөнки көн саен температура күрсәткечләрен исәпкә алып барган. Тәүлеклек ведомостьлары буенча, 25 сентябрьдән 24 октябрьгә кадәр су температурасы +52,87 дән +58,88 градус Цельсий чикләрендә тирбәлгән, ә аннары акрынлап берничә ай эчендә +52,06 градуска кадәр төшкән.
Исегезгә төшерәбез, кайнар суның норматив температурасы Цельсий буенча +60 тан +75 градуска кадәр булырга тиеш. Түбән температура бусагасын үтәмәү куркыныч, чөнки суда зарарлы бактерияләр барлыкка килергә мөмкин. Югары чиктән артып китү, үз чиратында, пешү һәм су белән тәэмин итү системаларының тиз тузуы белән куркыныч тудыра.
Закон таләпләрен санга сукмаган һәм гамәл кылмаган өчен, “Бугульминское предприятие тепловых сетей” АҖ Рәсәй Федерациясе Административ хокук бозулар кодексының 7.23 статьясының 2 өлеше нигезендә административ хокук бозуда гаепле дип табылды. Нәтиҗәдә компаниягә 40 мең сум штраф салынган.
Татарстан Торак инспекциясе матбугат хезмәте