Идарәче компания Чәчәк бульварындагы йорттагы тәртипсезлек өчен түләячәк
Яр Чаллы шәһәренең Чәчәк бульварындагы 9/24Д номерлы йортта яшәүчеләр гаделлеккә ирешкән: әлеге йортны карап тоту өчен җаваплы идарәче компания директоры административ җаваплылыкка һәм 50 мең сум штрафка тартылган. Моның сәбәбе - йортта яшәүчеләрнең берсенең мөрәҗәгате буенча тикшерү барышында ачыкланган гомуми милекнең канәгатьләнерлек булмаган торышы.
Тикшерү шикаятьтә яңгыраган барлык фактларны раслады. Йортның подъездларында күптән ремонт үткәрелмәгән: диварлар һәм түшәмнәр ярыклар белән капланган, тәрәзә төпләре яраксыз хәлгә килгән. Инженерлык системалары белән дә җитди проблемалар ачыкланган: чүп үткәргечләр төзек түгел, ә 12 нче катта кайнар су торбаларында җылылык изоляциясе юк. Моннан тыш, балконнарда эре габаритлы чүп-чар җыелган, ә берничә катта (7,8 һәм 12) тәрәзәләр ватылган. Гомуми файдалану урыннарында яктырту булмау шулай ук хокук бозуларның берсе булды.
Йортны карап тотуда җитешсезлекләр өчен “Ремжилстрой” идарәче компаниясе директоры РФ КоАП 14.1.3 маддәсенең 2 өлеше буенча гаепле дип табылган. 50 мең сум штрафтан тыш, инспекция барлык ачыкланган хокук бозуларны бетерүне контрольгә алды.
Татарстан Торак инспекциясе матбугат хезмәте