Законсыз планлаштыруның ике очрагы
Түбән Кама шәһәрендә бер атна эчендә Мәктәп бульвары урамындагы 3 нче һәм Вахитов проспектындагы 12 нче йортларның торак булмаган биналарында законсыз планлаштыруның ике очрагы ачыкланды.
Беренче адрес буенча беренче катта 5 бүлмә арасындагы диварлар җимерелгән. Икенче адрес буенча, ишек уемнары өчен диварларның бер өлешен сүткәннәр, бәдрәфләр җиһазландырганнар, тәрәзәләрне сүткәннәр һәм түбәгә чыгу юлын ясаганнар.
Бина хуҗалары 4 мең сум штраф рәвешендә административ җаваплылыкка тартылдылар. Хокук бозуларны бетерү турында күрсәтмә бирелде.
Башкарма комитетның ведомствоара комиссиясе белән килештерелгән үзгәртеп планлаштырулар гына законлы. Шуңа күрә башта килештерергә, аннары ремонт ясарга кирәк.
Милекчеләрнең ике юлы бар: законлаштыруга гариза белән ведомствоара комиссиягә мөрәҗәгать итәргә яисә башлангыч проектны торгызырга. Терәк диварларга тимәгәч, рөхсәт алу мөмкинлеге күбрәк.
Татарстан Торак инспекциясе матбугат хезмәте