Казанда газ белән тәэмин итү турында
Ял көннәрендә республика башкаласында фатирларда вентиляция проблемалары белән ике очрак теркәлгән. Назарбаев урамындагы 62 нче йортта – кире тарту, Октябрьнең 40 еллыгы урамындагы 13нче йортта – һава тарту көченең зәгыйфьлеге.
Тикшерүләрдән соң газ белән тәэмин итүне торгызганнар. Ике адрес буенча да техник хезмәт күрсәтү быел үткәрелгән, һәм Татарстан Торак инспекциясенең эшләр сыйфатына сораулары бар. Тикшерү башланды.
Бүгенге көндә Казанда 2109 фатирда газ белән тәэмин итү өлешчә башкарыла. Газ белән җылыту колонкалары Казанның 48 йортында сүндерелгән. Белинский урамындагы 41 нче йортта газ белән тәэмин итү туктатылган. Өстәвенә, тулысынча: яшәүчеләр газ хезмәткәрләрен йортларына кертмиләр. Алар керү мөмкинлеген тәэмин итмичә, «зәңгәр ягулык»ны бирмәячәкләр.
Газ хезмәткәрләренең бурычы – фаҗигане булдырмый калу. Максатларның берсе – колонкаларга бара торган торбаларны ябу. Күрәсең, нәкъ менә шуның аркасында яшәүчеләр ишекне ачмыйлар да. Әмма барлык 80 фатирдагы плитәләр дә сүндерелгән.
Инспекциягә су җылыту колонкаларында «зәңгәр ягулык» сүндерелүгә карата 57 шикаять килде. Аларның 19ы – Юго-Западная урамындагы 29 нчы йортта яшәүчеләрдән.
Сүндерүләр төтен юлларының һәм вентканалларның канәгатьләнерлек булмаган торышына бәйле. Газ хезмәткәрләре мәгълүматларына караганда, быел Татарстанда исле газ белән агулануның 25 очрагы теркәлгән, шуларның 9ы үлемгә китергән. Төтен юлларының һәм вентканалларның төзек булмавына беренче шик туганда ук хезмәт күрсәтүче оешмалар газ белән тәэмин итүне туктатырга тиеш
Милекчеләрнең һәм Татарстан Торак инспекциясенең моңа бәйле рәвештә йорт эчендәге һәм фатирдагы газ белән тәэмин итү җайланмаларына, гомумән, гомумйорт мөлкәтенә хезмәт күрсәтү белән шөгыльләнүчеләргә карата ике соравы бар:
- төтен чыгару юллары һәм ветканаллар, ягъни гомумйорт милке ни өчен шундый хәлгә җиткерелгән;
- кайнар су белән тәэмин итү хезмәте кайчан барлыкка киләчәк.
Татарстанның Торак инспекциясе Авиатөзелеш, Мәскәү һәм Киров районнарының идарәче компанияләренә карата тикшерүләр башлап җибәрде.
Татарстан Торак инспекциясе матбугат хезмәте