Тагын – 58: Мәскәү районы ИК директоры штрафка тартылды
Торак инспекторлары башкаланың Мәскәү районы идарәче компаниясе территориясендә кабат булдылар. Бу юлы Хөсәен Ямашев урамы буенча 17 нче йортта яшәүченең шикаяте буенча. Хатта язылган фактлар расланды.
Инспекторлар кайбер хокук бозуларны ачыкладылар: подвалда чи грунт, торбалар ага, су белән тәэмин итү һәм су агызу системалары буенча документлар юк, гомумйорт электр энергиясен исәпкә алу приборлары төзек түгел, урыны белән җылыту торбаларының җылылык изоляциясе юк, цоколь стеналарындагы буяу һәм штукатурка җимерелә һ.б.
Әлеге йорт белән идарә иткәндә берничә норматив-хокукый акт бозылган. Мисал өчен, идарәче компания ачыклау белән үк, зарарлануны катлауландырмас өчен, барлык җитешсезлекләрне бетерергә тиеш иде. Кечкенә ярыкка вакыт та, иң мөһиме, милекчеләрнең акчасы да күпкә азрак таләп ителә. Һәм төп таләпләрнең берсе – җилләтелә торган коры подвал. Ә монда беренче кат астында хәтта куаклар да үскән.
«Мәскәү районы ТКХ ИК» ҖЧҖ директоры чираттагы тапкыр Россия КоАП 14.1.3 ст. 2 өлешендә каралган хокук бозуда гаепле дип табылды һәм аңа 58 мең сум күләмендә штраф билгеләнде.
Җитешсезлекләрнең бетерелүе Инспекция контролендә кала.
Татарстан Торак инспекциясе матбугат хезмәте