Капиталь ремонтның бер атна эчендәге тискәре һәм уңай яклары
Түбәне ачтылармы – яңгыр ява башлаячак. Бу дөрес юрама. Бигрәк тә Зеленодольк кешеләре өчен. Узган ел торак инспекторлары берничә тапкыр тикшерүгә чыктылар һәм хокук бозуларны бетерү турында күрсәтмә бирделәр, һәм бу сезон да искәрмә түгел. Кичә Столичная урамындагы 8а йортта түшәмнән яңгыр яуган. Эшчеләрнең төзелеш материалларын түбәгә күтәреп, эшкә керешүләрен күреп сөеюнәләре озакка бармаган. Әлегә 8 һәм 9 катлардагы баскычларны гына су баскан. «ТР ТКХ фонды» коммерциясез оешмасы капиталь ремонт регоператорына гомуми файдаланудагы урыннарда 5 июньгә кадәр ремонт ясарга һәм киләчәктә мондый хокук бозуларга юл куймаска дигән күрсәтмә бирелде.
Бер атна эчендә инспекторлар капиталь ремонт барышын тикшергәндә 11 йортта хокук бозуларны ачыкладылар. Казан, Зеленодольск шәһәрләрендә, Әгерҗе һәм Менделеевск районнарында.
Әгерҗе шәһәрендә Гагарин тыкрыгындагы 1 нче йортта эшләр туктатылган – фасадны ремонтлый башлаганнар, ә проекты әлегә юк.
Менделеевск шәһәренең Коммунистик урамындагы 14 нче һәм Совет урамындагы 22 нче йортларда фасадны җылытканда газүткәргеч торба чыгаруны күздә тотмаганнар. Өйгә панельләрдән "тун" кидерәләр, ә газүткәргеч диварларга якын урнашкан, һәм эчтә кала алмый. Шуңа күрә газүткәргеч астындагы диварның бер өлеше "ялангач" калачак. Йортта яшәүчеләр өчен мондый "җылыту" нәрсәгә китерәчәк? Аннары, кинәт зарурлык килеп туса, газ торбасын ничек ремонтларга?
Монда Татарстан Торак инспекциясенең позициясе бер мәгънәле – фасад җылытылса, газүткәргеч җылыту панельләреннән читтә булырга тиеш. Моннан тыш, Менделеевскида бу йортларга проектлар әлегә кадәр юк.
Казанның Рихард Зорге урамындагы 5а йортының түбәсен бозып ремонтлыйлар: өрлекләр диварга беркетелмәгән, бөтен түбә буйлап горизонталь борыслар бер-берсенә беркетелмәгән.
Новаторлар урамындагы 5 нче йортта эшчеләр юк иде. Әмма булырга тиеш булмаган әйбер табылды – гомуми файдалану урыннарында төзелеш калдыклары ята һәм электр үткәргечләргә ирекле керү мөмкинлеге булдырылган.
Түбән Кама лидер позициясен саклап кала: бу атнаның уңай мисаллары янә монда гына. Шинчылар урамындагы 47 нче, Химиклар проспектындагы 72 нче, Тукай урамындагы 12 нче йортларның фасадларын ремонтлау һәм Чулман урамындагы 15 нче йортта лифтларны алмаштыру – үрнәк булып тора.
Татарстан Торак инспекциясе матбугат хезмәте