Чаллы нәниләренә балалар мәйданчыгын кайтардылар
Бер ел элек Автокалада Мәскәү проспектындагы 72 нче йорт ишегалдына «Безнең ишегалды» программасы килә. Ләкин сөенеч озакка бармаган: маргиналлар балаларны кысрыклап чыгарганнар. Ә идарәче компания берни дә эшләмәгән.
«Балалар мәйданчыгы янында иске эскәмияләрне алып атмадылар. Ремонттан соң бер ел узды инде. Көн саен анда ирләр җыела - карта уйныйлар, сүгенәләр, спиртлы эчемлекләр эчәләр, чүп-чар: мебель, катыргы җыялар. Аңлаешсыз чиләкләр тора, шунда ук алар өчен бәдрәф – безнең подъезд. Ә янәшәдә балалар йөри һәм мондый картинаны күзәтергә мәҗбүрләр. ТЭК шалтыраттык, гариза яздык, әмма тәртипсезлек һәм эшсезлек белән бер ел узды. Йөрәк әрни! Ярдәм итегез безгә! Безнең ишегалды чыннан да ахыргача төзек булыр дип өметләнәбез!» – диелгән мөрәҗәгатьтә.
Инспекторлар тикшерү белән чыктылар: балалар мәйданчыгында чүп-чар, футбол кыры периметры буйлап шешәләр аунап ята. Канәгатьләнерлек хәлдә булмаган иске эскәмияләр демонтаж ителмәгән һәм чүп савытыларының буялары купкан, алар сынык, янәшәдә чүп-чар белән тулган чиләк тора, тәмәке төпчекләре һәм чүп-чар аунап ята.
Исегезгә төшерәбез, ел саен республика бюджетыннан Татарстан Республикасы Рәисенең «Безнең ишегалды» программасын гамәлгә ашыруга 10 млрд.сум акча бүлеп бирелә. 5000 ишегалды төзекләндерелгән инде. Яңартылган территорияләрнең сакланышын тәэмин итү – идарәче компанияләрнең бурычы. Ләкин барысы да тырышмый. Торак инспекторлары барлык яңартылган ишегалларына да барачак. Программа ярдәмендә йорт яны территориясендә барлыкка килгән төзекләнешне тулысынча саклап кала алмаганнар икән, - сум белән җәза булачак. «Электротехников» ИК ҖЧҖ директоры 25 мең сум штраф рәвешендә административ җаваплылыкка тартылды. Шулай ук хокук бозуларга юл куймау һәм контрольне көчәйтү турында күрсәтмә дә бирелде.
Татарстан Торак инспекциясе матбугат хезмәте