Торак инспекциясе «Жилье» ИК директоры урынбасарын дисквалификацияләүгә ирешергә тели
Кар эреде, күгәрек калды. Түбән Кама шәһәрендә яшәүче хатын-кыз үз фатирының стенасы артындагы кар чүплеген бетерүне таләп итте. Ләкин уңышсыз. Идарәче компания Химиклар урамындагы 23 нче күпфатирлы йорт диварына кыш буе кар салып барган.
«Фатирда юеш. Минем йокы бүлмәмдә обойлар зарарланды, күгәрек исе. Шулай ук подвалны һәм чорманы да тикшерүегезне сорыйм. Подряд оешмасы хезмәткәрләре, подвалдан су суыртканда, төзелеш вакытында яңгыр суларын җыю җайланмасы төзелеше бозылган дип аңлаттылар», - диелә мөрәҗәгатьтә.
«Жилье» ИК идарәче компаниясе Торак фондын техник эксплуатацияләү кагыйдәләре һәм нормаларының 10 пунктын бозган: су агызу, су басу һәм подвалдагы чүп-чар системасында системалы рәвештә тыгылу очраклары, торбаүткәргечләрнең җылылык изоляциясе төзек түгел, чүп җыю камерасында санитар эшкәртү үткәрелмәгән, түбәдәге парапет һәм фасадтагы штукатурка коела, тышкы стеналардан суны тоткарлыксыз агызу тәэмин ителмәгән һ.б.
Директор урынбасарына карата административ хокук бозу турында беркетмә төзелде. Эш Торак инспекциясеннән штраф белән генә чикләнмәячәк: эш материаллары дисквалификацияләү максатында судка тапшырылды. Вазыйфаи зат берничә тапкыр административ җаваплылыкка тартылган инде. Нәтиҗәсе юк.
Моннан тыш, хокук бозуларны бетерүгә күрсәтмә дә бирелде. Су агызу җайланмасындагы чүпләрне кичекмәстән чистартырга һәм подвалны киптерергә, торбаүткәргечнең агуын бетерергә, калганнарын 7 июльгә кадәр эшләп бетерергә.
Татарстан Торак инспекциясе матбугат хезмәте