Мамадыш районы ИК директорына штраф салынды
Татарстанның Торак инспекциясе узган елдан башлап гражданнарны күчмә кабул итә. Ягъни шәхси кабул итү дә, контроль-күзәтчелек чарасы да шунда ук башкарыла. Алдагы көнне, Мамадыш шәһәренә Алабуга районара инспекциясе белгечләре килеп, мөрәҗәгать итүче белән аралаштылар. М.Җәлил урамындагы 4 нче йортта яшәүче хатын хәбәр иткәнчә, аларның йортын даими рәвештә су баса. Ә идарәче компания эшләми.
Тикшерү барышында инспектор салкын су торбаларының агуын һәм коррозиясен, нәтиҗәдә су басу, подвалның юеш фундаментын һәм конструкциясен, көнкүреш әйберләре складын һәм подвалдагы чүп-чарны һ.б. ачыклаган. Ягъни милекчеләрнең мөлкәтен тоту шартлары закон таләпләренә туры килми.
«Мамадыш муниципаль районы һәм Мамадыш шәһәре ИК» ҖЧҖ директорына үзенең һөнәри вазыйфаларын болай башкару 25 мең сумга төште. Штраф хаталар өстендә эшләүдән азат итми: директор хокук бозуларны бетерү турында хисап бирергә тиеш.
Һәр сишәмбе республика инспекциясендә һәм барлык структур бүлекчәләрдә гражданнарны шәхси кабул итү үткәрелә. Элемтәгә керү өчен мәгълүматлар һәм язылу тәртибе сайтта урнаштырылган.
Татарстан Торак инспекциясе матбугат хезмәте