Срок бетте: сезнең кышка әзерләнү планыгыз бармы?
Бүген, 30 апрель, йортны чираттагы җылыту сезонына әзерләү планы йортны җылылык белән тәэмин итүчеләр белән килештерелергә тиешле соңгы көн. Һәм сүз йорт белән идарә итү – бизнес булганнар турында гына түгел. Идарә итүнең барлык формалары өчен дә. ТМШ, ТТК, күчемсез мөлкәт милекчеләре ширкәтләре һ.б. – искәрмә түгел.
Срок Россия Энергетика министрлыгының 2234 нче боерыгы белән билгеләнгән: күпфатирлы йортлар белән идарә итү буенча эшчәнлек алып баручылар, 30 апрельдән дә соңга калмыйча, эшләр планын расларга тиеш.
Әзерлек планына фатирларга җылылык бирү процессында кулланыла торган барлык системаларны һәм җайланмаларны тикшерү, ремонтлау һәм көйләү керә. Аларның кайберләре: котельныйлар, җылылык пунктлары һәм узеллар; газ хуҗалыгы, насос станцияләре һәм янгынга каршы җайланмалар системалары, үзәктән җылыту системаларын ремонтлау һәм көйләү, подваллардан су суырту һ.б.
Барысы да аңлашылмыймы? Әллә кызык түгелме? Ләкин боларның барысын да эшләмәсәң, ресурслар белән тәэмин итүче кирәкле рычагларга басмаячак, һәм батареялар салкын булып калачак.
Әгәр өйдә идарәче компания булса, бөтен процесс белән аның белгечләре шөгыльләнә. Әгәр дә ширкәтләр, кооперативлар яки турыдан-туры идарә икән, барлык нечкәлекләргә, нормаларга һәм кагыйдәләргә үзебез төшенергә туры киләчәк. Законнарны, боерыкларны, карарларны өйрәнергә, килешүләр төзергә…
Сезнең йортыгызның шундый планы әзерме? Идарәче компаниядәме яки ширкәт рәисендәме, аныклагыз. Алга таба эш төгәл график буенча, калышмыйча алып барылырга тиеш. Иң мөһиме – җитешсезлекләрне калдырмыйча, системалар гидравлик сынауларга түзәрлек булырлык итеп. Башкарма комитет комиссиясе йортны карап чыгачак. Әгәр әзер дип таныса, объектның җылылык куллану җайланмасының җылылык чорына техник әзерлеген тикшерү актына кул куя һәм әзерлек паспортын бирә.
Исегезгә төшерәбез, 15 сентябрьгә кадәр йортта тәрәзәләр, ишекләр ватылганмы, ябылмыймы, подвалны су баса, отмосткада ярыклар бар, цоколь коела, чормада һәм подвалда чүп-чар, торбалар агып тора икән – йорт әзер түгел. Хәтта паспорт булса да.
Бу очракта инспекторлар идарәче оешмага гына түгел, документны имзалаган башкарма комитет хезмәткәренә дә сораулар бирәчәк. Әгәр салкыннарда гадәттән тыш хәл килеп чыкса һәм йөзләгән гаилә җылытусыз калса, әзерлекнең сыйфатын раслаучыларның барысы да җаваплылыкка тартылачак.
Татарстан Торак инспекциясе матбугат хезмәте