170 мең сумлык «сервис»
«Сервис индустрия» идарәче компаниясе директоры all inclusive сервисын күрсәтә: кайнар һәм салкын су белән тәэмин итү челтәрләреннән су тама, подвалда чүп-чар, отмосткада ярыклар, йорт яны территорияләре җыештырылмый, җир асты стоянкасының стеналарындагы штукатурка җимерелә, подъездга керү урыннарында ярыклар һ.б. шундый «сервис» өчен аңа бер көн эчендә 3 штраф билгеләнде.
Татарстан Торак инспекциясенә Казан шәһәренең Шуртыгин урамындагы 7нче, Ю.Фучик урамындагы 86нчы һәм Танк урамындагы 2нче йортларда яшәүчеләрдән шикаятьләр килде. Һәрбер мөрәҗәгать буенча тикшерүләр үткәрелде. Һәм һәрберсенең нәтиҗәләре буенча – административ хокук бозу турындагы эш буенча карарлар. Штрафларның гомуми суммасы – 170 мең сум.
Хокук бозуларны бетерү буенча бирелгән күрсәтмәләр үтәлеше Инспекция контролендә.
Татарстан Торак инспекциясе матбугат хезмәте