Тагын «Осиново» ИК
«Осиново» ИК директоры, антирейтингта лидерлыкка дәгъва итә күрәсең: апрель өчен өченче штраф. Зеленодольск районында чираттагы тикшерүне уздыру өчен тагын әлеге ИК сәбәп булды. Бу айда директор 104 мең сум түләгән инде. Һәм менә тагын бер штраф. Бу юлы шикаять Осиново бистәсенең Гагарин урамындагы 3 нче йортта яшәүчедән килде.
«Контейнерлар чүп-чар белән тулган, ботаклар җыялар, эре габаритлы чүп-чар аунап ята», - дип язылган мөрәҗәгатьтә.
Тикшерү барышында инспекторлар тагын да күбрәк хокук бозуларны ачыкладылар: 2 нче подъездның тышкы ишеге буялмаган, идәндә ярыклар, стеналардагы буяулар һәм штукатуркалар коела, подвалда төзелеш һәм көнкүреш чүп-чарлары, җылыту системасының җылылык изоляциясе юк.
Директор 52 мең сум штраф рәвешендә административ җаваплылыкка тартылды. Алда судка дисквалификацияләү буенча дәгъва көтәргә мөмкин.
Бозуларны бетерү буенча бирелгән күрсәтмәнең үтәлеше Инспекция контролендә.
Татарстан Торак инспекциясе матбугат хезмәте