Диспетчерлык бүлмәсендәге тынлык кеше гомерен өзгән
Әлмәттә Герцен урамындагы 94 нче йортта фаҗига булган. Пенсионерның кинәт йөрәге борчый башлаган. Күршеләр оператив рәвештә ашыгыч ярдәм чакыртканнар, ләкин лифт яңадан төзексез булып чыккан. Диспетчерлык белән элемтә элеккечә эшләмәгән. Битараф булмаган кешеләр ир-атны баскычтан кул белән төшергәннәр – башка чыгу юлы булмаган. Шул ук көнне пенсионер вафат булган. Табиблар фикеренчә, кирәкле вакыт кулдан ычкындырылган, ә аның хәлендә баскычтан төшү һәлакәткә китергән.
Бу йортка «Первый поселок» ИК» ҖЧҖ хезмәт күрсәтә. Йортны карап тоту белән проблемалар беренче тапкыр гына теркәлми. Әлмәт районара торак инспекциясе тарафыннан 2024 елның 6 декабрендә үткәрелгән планнан тыш тикшерү нәтиҗәләре буенча күпфатирлы йортның гомуми мөлкәтен тиешенчә карап тотмау, шул исәптән лифтларны диспетчерлаштыру элемтә төймәсенең төзексезлеге ачыкланган. Административ хокук бозулар турында РФ кодексының 14.1.3 ст. 2 өлеше буенча беркетмә төзелгән һәм 2025 елның 17 гыйнварына кадәр хокук бозуларны бетерүне таләп итеп күрсәтмә бирелгән булган.
Әмма 2025 елның 5 мартында Татарстан Республикасы Прокуратурасы белән килештереп үткәрелгән кабат инспекция визиты нәтиҗәләре буенча күрсәтмәнең үтәлмәве ачыкланды. Диспетчерлык белән элемтә элеккечә юк иде. Шуңа бәйле рәвештә «Первый поселок» ИК» ҖЧҖ юридик затына карата Административ хокук бозулар турында РФ кодексының 19.5 ст. 24 өлеше буенча беркетмә төзелде, материаллар җәмәгать судына җибәрелде, хокук бозуларны бетерү срогы белән 2025 елның 14 апреленә кадәр кабат күрсәтмә бирелде. Таләпләр арасында – диспетчерлык хезмәте белән кире элемтәне торгызу.
Шунысын да билгеләп үтәргә кирәк, хокук бозулар — бер генә түгел. Ә узган ел ИК гамәлгә куючыга карата дисквалификацияләү турында материаллар судка бирелде. Ләкин Фемида чираттагы штраф белән генә чикләнде. Узган ел аңа 1 миллион сумнан артык штраф салынган иде. Тикшерүләр турында актларның берсе А4 форматындагы 45 юлны алып тора.
Компетентлы органнар җаваплы затларның гамәлләренә һәм гамәл кылмауларына хокукый бәя бирәчәк. Ә халыктан үтенәбез: игътибарсыз калдырмагыз. Әгәр сезнең өегездә лифт эшләмәсә яки диспетчерлык төймәсенә басканнан соң — тынлык булса, моны «гадәти хәл» дип санамагыз. Кыска гына видео төшерегез дә безгә җибәрегез. Бу проблеманы тизрәк теркәргә һәм чаралар күрергә ярдәм итәчәк. Һәрбер хәбәр өлкән яшьтәге кешеләр, инвалидлар яки кечкенә балалы гаиләләр яшәгән йортларда аеруча мөһим. Сезнең игътибарлы булуыгыз кемнеңдер гомерен саклап калырга мөмкин.
Татарстан Торак инспекциясе матбугат хезмәте