Казанда тагын бер «уңайлы» йорт
Агымдагы елның 1 августына кадәр бетерергә – «Уютный дом» идарәче компаниясенә шундый күрсәтмә бирелде. Инспекторлар Казанның Ямашев урамындагы 104 нче йортының 1 нче корпусында булдылар, кайбер хокук бозуларны ачыклап, аларны төзәтергә мәҗбүр иттеләр.
Республиканың Торак инспекциясенә йортта яшәүчеләрнең күмәк шикаяте килде.
«2024 елның декабрендә подвалны өч тапкыр кайнар су басты, авария 2025 елның гыйнварында да кабатланды. Беренче каттагы фатирларда юештән кырыгаяклар һәм вак чебеннәр барлыкка килде», – диелгән мөрәҗәгатьтә.
Контроль-күзәтчелек чарасы вакытында подвалда су басу эзләре юк иде. Әмма йортны тиешенчә карап тотмауның башка фактлары теркәлде: подъезд стеналарыннан, керү төркемнәрендә штукатурка һәм буяулар коела. Күрсәтмә срогы тәмамлангач, инспекторлар яңадан өйгә киләчәк.
Исегезгә төшерәбез, элегрәк суд Торак инспекциясенең әлеге идарәче компания директорына каршы дәгъвасын өлешчә хуплаган иде. Җәмәгать судьясы, Гаврилов урамындагы 2 нче йортны карап тоту турындагы эш материалларын карап чыгып, «Уютный дом» ИК директорының Административ хокук бозулар турында РФ кодексының 14.1.3 ст. 2 өлеше буенча административ хокук бозуын раслады. Вазыйфаи затка 70 мең сум күләмендә штраф билгеләнде.
Татарстан Торак инспекциясе матбугат хезмәте