Ярамыймы әллә теләмиләрме?
Татарстанның Торак инспекциясенә Зеленодольск шәһәренең Татарстан урамындагы 7/29 йортта яшәүче хатын мөрәҗәгать итте. Милекче йорт коточкыч хәлдә дип раслый.
«Стенадагы ярыкларны сыладылар, ләкин кирпеч аша җил үтә. Салкын су торбасы өзелгән, бер атна сусыз яшәдек. Идәннәр чатнаган, юып булмый. Җыештыручы да юк – торак-коммуналь хуҗалык оешмасында тиеш түгел, диләр!», - дип язылган мөрәҗәгатьтә.
Тикшерү барышында инспектор 11 бозу очрагын ачыклады: фасадның кирпеч өеме катламнары ватылган, тәрәзәләрдә пыялалар юк, электр щитлары калын тузан астында, отмосткада ярыклар һәм утырган урыннар һ.б.
Бернәрсә дә эшләмәгән өчен «Жилкомсервис» ИК» ҖЧҖ директорына 58 мең сум штраф салынды. Хокук бозуларны бетерү буенча бирелгән күрсәтмә үтәлеше Инспекция контролендә.
Әгәр милекчеләр идарәче компания белән килешү төзегән икән, аңа йортка хезмәт күрсәтү бурычы йөкләнә. Милекчеләр белән килешү төзегәндә идарәче оешма эшләр һәм хезмәт күрсәтүләр исемлеген һәм алар өчен түләү күләмен расларга тиеш.
Идарәче оешмалар милекчеләр алдында гомуми мөлкәтне тиешенчә карап тотуны тәэмин итә торган һәм сыйфаты техник регламентлар таләпләренә туры килергә тиешле хезмәтләр күрсәтү һәм (яисә) эшләр башкару өчен җаваплы булалар.
Подъездны җыештыруны штатлы хезмәткәр генә үткәрә ала дигән сүз түгел. Вариант буларак, клининг фирмасын ялларга яки җәлеп итәргә мөмкин.
Гомуми милекне карап тоту гомуми файдаланудагы биналарны җыештыруны һәм санитария-гигиена ягыннан да чистартуны күздә тота.
Күпфатирлы йортта гомуми мөлкәтне тиешенчә карап тотуны тәэмин итү өчен кирәкле хезмәт күрсәтүләр һәм эшләр минималь исемлегенең 23 пунктында һәм 170 нче номерлы Торак фондын техник эксплуатацияләү кагыйдәләре һәм нормаларының 4.8.14 пунктында идарәче компаниянең ниләрне һәм никадәр ешлык белән эшләргә тиешлеге күрсәтелгән.
Мәсәлән, баскыч шакмакларын даими җыештыру тәэмин ителергә тиеш: тәрәзәләрне, тәрәзә төпләрен, җылыту приборларын пычрактан чистарту – 5 көнгә кимендә 1 тапкыр; стеналарны – аена кимендә 2 тапкыр; юу – аена кимендә 1 тапкыр; аскы һәм өске катлардагы баскыч шакмакларын ачык форточкалар, тәрәзәләр, фрамугалар яисә вентиляция каналлары аша бер үк вакытта җилләтү башкарылырга тиеш.
Татарстан Торак инспекциясе матбугат хезмәте