Үз күзләреңә ышанма, диләрме әле?
Янә «Әйбәт» идарәче компаниясенең «казанышлары» турында сөйлибез. Бу юлы Түбән Кама оешмасы бер йортта 20 хокук бозу очрагына юл куйган. Гадәттәгечә Татарстан Торак инспекциясенә шикаять килде. Вахитов проспектындагы 17 нче йортның барлык милекчеләре дә битарафлыкка һәм гамьсезлеккә түзә алмаган.
Отмосткадагы ярык та бозу булып тора, ә монда ярыклар да, утырган урыннар да бар. Подвалда дым, хуҗалык-фикаль агынты эзләре күренә, чүп камераларында проблемалар шактый, фасадта штукатурка коела – Торак фондын техник эксплуатацияләү кагыйдәләрен һәм нормаларын бозуның 20 очрагы – тулы бер «бәйләм».
Барлык хокук бозулар да ярты ел эчендә килеп чыга алмаган: 2024-2025 еллар ягу чорына әзерлек паспорты нигезендә, йорт бик яхшы хәлдә булырга тиеш. Һәрхәлдә, мәгълүматны «ТР торак фонды мониторингы» дәүләт мәгълүмат системасына кертү вакытына шулай булган. Паспорт алынган һәм системага урнаштырылган икән, димәк, өйдә барысы да тәртиптә, дигән сүз. Инспекторларга үз күзләренә ышанмаскамы?
Нәтиҗә шик тудырмый: ачыкланган хокук бозулар йортның агымдагы ягу сезонына әзерлеген раслаучы документларга каршы килә.
Идарәче компаниянең директор урынбасарына чаралар күрмәү 50 мең сумга төште: аңа штраф рәвешендә административ җәза билгеләнде. Бозуларны бетерү буенча бирелгән күрсәтмәнең үтәлеше Инспекция контролендә. Ул очракта киләсе ягу сезонына йорт чыннан да әзер булачак.
Татарстан Торак инспекциясе матбугат хезмәте