Бүгенме, әллә 225 елдан соңмы?
«Без нәрсә өчен түлибез? Безгә ремонт ясадылар инде, нигә без барыбер түлибез? Нигә шулай озак көтәргә?» – Татарстанның Торак инспекциясенә мондый сораулар еш килә. Әйдәгез, санап карыйк.
Быелгы капиталь ремонт программасына 915 йорт кертелгән. Һәркемнең тупланмалары бар, әмма булган сумма йортны тулысынча реконструкцияләүгә җитмәячәк. Шуңа күрә чыгымнар регоператорның «гомуми казнасы» аша түләнә.
Мисал өчен, быел Казан шәһәренең И.Гаспринский урамындагы 31 нче йорт нигезеннән түбәсенә кадәр яңартылачак. Торак һәм торак булмаган биналарның мәйданы 3 мең кв.м. тәшкил итә. Ремонт бюджеты – 67 млн.сумнан артык. Бу сумманы мөстәкыйль рәвештә җыю өчен милекчеләргә 225 ел көтәргә туры килер иде.
Маяковский урамындагы 4а номерлы йорт хуҗаларына үз йортларын ремонтлау өчен 205 ел эчендә 48,5 млн.сум җыярга кирәк.
Зәй шәһәренең Ленин урамындагы 7 нче йортта яшәүчеләргә 12,7 млн.сумны 200 ел туплыйсы.
Баулыларга Горюнов урамындагы 383 кв.м. мәйданлы 1 нче йортны ремонтлауга – 195 ел.
Чаллы халкы тизрәк җыячак: Сөембикә проспектындагы 23/40 номерлы йортны ремонтлауга, (гомуми мәйданы 9,5 мең кв.м.) 56,3 млн.сум җыяр өчен нибары 59 ел көтәсе.
И.Никитин урамындагы 9 нчы йортта яшәүче бөгелмәлеләргә дә азрак көтәсе – 8,1 мең кв.м. исәпләнгән масштаблы ремонтка бүген 38,9 млн.сум кирәк. Бу сумманы 47 ел эчендә тупларга мөмкин.
Шулкадәр озак көтмәс өчен уртак казна булдырылган да инде. Милекчеләр үз мөлкәтләрен яңартуга акчаны аванс белән ала кебек, һәм хәтта ремонттан соң да түләүләрен дәвам итәләр. Аларның кертемнәре башка йортларны ремонтлауга тотыла.
Билгеләп үтик, бюджетлар бүгенге бәяләр буенча күрсәтелгән. Инфляцияне исәпкә алып бәяләр үсәчәк кенә.
Күпфатирлы йортларны капиталь ремонтлау буенча төбәк программасы – бу, беренче чиратта, бюджет инвестицияләре: республика һәм муниципаль бюджетлардан кергән акчалар. Чөнки иске фондны реконструкцияләүгә шактый акча таләп ителә. Һәм татарстанлыларның үз кертемнәре. Татарстанда капиталь ремонт буенча төбәк операторы булып «Торак-коммуналь хуҗалык фонды» коммерциясез оешмасы тора. Ул үз счетларында татарстанлылар түләп барган акчаларны туплый. Фатир хуҗалары һәр ай саен квадрат метры өчен 8 сум 47 тиен түлиләр. Бер ел эчендә регоператор счетында 5 млрд.сумга якын акча җыела.
Татарстан Торак инспекциясе матбугат хезмәте