Александр Тыгин: милекчеләр сум белән тавыш бирә ала
Әлмәт районы башкарма комитеты җитәкчесе Гүзәл Хәбетдинова һәм Татарстанның баш дәүләт торак инспекторы Александр Тыгин Түбән Мактама штп. торак фондын тикшерделәр.
Инспекция барышында Девонская, Совет, Садовая, Некрасов һәм Һади Такташ урамнарындагы күпфатирлы йортларны карадылар. Баш инспектор һәм район башлыгы подваллардан алып түбәләргә кадәр йортларны җентекләп карадылар, кайбер фатирларга керделәр. Халык торак-коммуналь хезмәтләргә кагылышлы сораулар һәм дәгъвалар белдерде.
Александр Тыгин идарәче компанияләр тарафыннан күрсәтелә торган хезмәтләрнең сыйфатын контрольдә тотуда халыкның актив позициясенең мөһимлеген ассызыклады.
«Милекчеләр, үз чиратында, сум белән тавыш бирә ала — алар күрсәтелмәгән хезмәтләр өчен түли торган идарәче компанияне алмаштырырга мөмкин», — дип искә төшерде Александр Тыгин.
Сыйфатсыз техник хезмәт күрсәтү, гомуми территорияләрне начар җыештыру, яшәүчеләрнең шикаятьләрен игътибарсыз калдыру һәм хезмәтләр бәясен арттыру ИК белән килешүне өзү өчен нигез булырга мөмкин. Идарәче оешмаларга таләпләр РФ Торак кодексында төгәл язылган.
Процедураның катлаулылыгына карамастан, ИК алмаштыру саллы нигезләр һәм күпчелек милекчеләрнең ризалыгы булганда мөмкин. Александр Тыгин шулай ук милекчеләрнең еллык җыелышларын уздыру зарурлыгына игътибарны юнәлтте, анда ИК хисабы, эш төрләре һәм йортларны карап тоту һәм аларга хезмәт күрсәтү тарифлары турында фикер алышырга кирәк.
Әлмәт районы башкарма комитеты җитәкчесе Гүзәл Хәбетдинова әлеге инициативаны хуплап, торак-коммуналь хуҗалык өлкәсенең халык өчен үтәкүренмәлелегенең һәм аңлаешлылыгының мөһимлеген ассызыклады.
«Ресурслар белән тәэмин итүче оешмалар алдында гаять зур бурычлары булган һәм күпфатирлы йортларда яшәүчеләр алдында хисап тотмаган намуссыз компанияләр бездә эшләргә тиеш түгел», — диде ул.
Гүзәл Хәбетдинова шулай ук халыкка мәгълүмат бирүнең мөһимлеген, аерым алганда, подъездларда җыештыру сроклары һәм ашыгыч хезмәт телефоннары булган мәгълүмат щитларын урнаштыруны билгеләп үтте.
Моннан тыш, Түбән Мактамага эш сәфәре барышында Александр Тыгин һәм Гүзәл Хәбетдинова гражданнарны шәхсән кабул иттеләр. Төп тема идарәче компанияләргә шикаятьләр булды. Барлык мөрәҗәгатьләр дә каралачак, һәм аларның күбесе буенча инде билгеләнгән вакытта гамәлгә ашырылачак карарлар билгеләнгән.
Әлмәт районында күчмә кабул итүләр ай саен үткәреләчәк.
Әлмәт муниципаль районы башлыгы матбугат хезмәте басмасы нигезендә