«Нептун+» ИК башлыгы подвалдагы бассейннар өчен түләячәк
Күрәсең, Менделеевск идарәче компаниясе үзен «Нептун+» дип атавы очраклы түгелдер - берьюлы өч йортта су басуга юл куйган. Татарстанның Торак инспекциясенә Тукай урамындагы 4 нче йортта яшәүчеләрдән күмәк шикаять килде: подвал су астында калган, ИК эшләми.
Торак инспекциясе прокуратура белән берлектә «Нептун+» ҖЧҖ эшчәнлеген тикшерде, шул ук урамдагы 8 һәм 12 нче йортларда проблемаларны ачыклады. Проблемалар бертөрле: подвалларны су баскан.
4 нче йорттагы авария турында ИК диспетчерына узган елның декабреннән үк хәбәр иткән булганнар. Теркәү журналы нигезендә, барысы да бетерелгән. Ләкин хәзер дә, мартта да, подвалда кайнар су торбалары ага. Аварияләр башка йортларда да булган: 12 нче йортта – кайнар су бассейны, 8нче йортта – салкын су бассейны. 8 көн дәвамында авария төзәтелмәгән – срок 3 тапкырга диярлек арттырылган.
Инспекция директорны административ җаваплылыкка тартты һәм 50 мең сум күләмендә штраф билгеләде. Җитешсезлекләрнең бетерелүе Инспекция контролендә кала.
Татарстан Торак инспекциясе матбугат хезмәте