Берәү аркасында алтау: Әлмәттә авария булган
Әлмәт шәһәрендә ял көннәрендә берьюлы алты күпфатирлы йортта яшәүчеләр кайнар сусыз калган. Авария Бигәш урамындагы 123 нче йортта килеп чыккан. Әмма ресурслар белән тәэмин итүче оешма коесында бу йортка задвижканың төзек булмавы аркасында, «Әлмәт җылылык челтәрләре» АҖ хезмәт күрсәтүче оешмасы шул ук урамдагы 121, 125 номерлы йортларга һәм Төзүчеләр проспектындагы 43, 43а, 49а номерлы йортларга кранны япкан.
Татарстанның Торак инспекциясе эшнең сәбәпләрен ачыклый: йөзләгән гаиләне сусыз калдыру күпме дәрәҗәдә зарури булган, Бигәш урамындагы 123 нче йортны җылыту чорына ничек әзерләгәннәр? Тикшерү идарәче компаниягә карата да, хезмәт күрсәтүчегә карата да үткәрелә. Гаепле вазыйфаи затлар административ җаваплылыкка тартылачак.
ТР ДТИ матбугат хезмәте