Поспеловодагы торак милекчеләре ширкәте мирасы
Алабуга районының «Домоуправ 3» идарәче компаниясе директорына күпфатирлы йортны карап тоту буенча 25 мең сум штраф салынды. Инспекторлар Лесная урамындагы 4 нче йортта яшәүченең шикаяте буенча Поспелово бистәсенә киттеләр.
Тикшерү вакытында йортны тиешенчә карап тотмау фактлары расланды: керү ишекләре ябылмый, подъездларның стеналарын буярга, култыксаларны ремонтларга, йорт яны территориясен кардан һәм боздан, түбәсен боз сөңгеләреннән чистартырга кирәк.
Поспелово бистәсендә 6 күпфатирлы йорт бар, һәм алар барысы да торак милекчеләре ширкәтенә кергән. Әлеге идарәче компаниянең торак фондын ярты ел элек кенә мирас итеп алуы – йомшарта торган хәл түгел. Стеналар күптән искергән булса да, кар һәм боз – торакларны карап тотучылар гаебе.
Идарәче компания башлыгы Административ хокук бозулар турында РФ кодексының 14.1.3 статьясының 2 өлеше буенча административ җаваплылыкка тартылды, аңа штраф рәвешендә җәза билгеләнде. Күрсәтмәнең үтәлеше Алабуга районара торак инспекциясе контролендә.
Татарстан Торак инспекциясе матбугат хезмәте