Фасад плитәсе купкан, кар һәм отмостка утырган: «Танкодром» идарәче компаниясе директорына 112 мең сум штраф салынды
«ТКХ Танкодром» идарәче компаниясе директорына көнгә ике штраф билгеләнде - 55 мең һәм 57 мең сум. Инспекторлар Отрадная урамындагы 46нчы йортта һәм Латыш укчылары урамындагы 25а йортта казанлыларның шикаятьләре буенча тикшерүләр үткәрделәр.
Беренче йортта торбаүткәргечләрнең коррозиясе һәм герметик булмавы, һәм, нәтиҗә буларак, су агу, отмостканың утыруы һәм ярыклануы, подъездлардагы стеналардагы буяу һәм штукатурка катламнарының кубу күренешләре һ.б. ачыкланды.
Икенчесендә: йорт фасадының тышлау плитәләренең катламы төшкән, су үтү эзләре һәм түшәмә плитәләрендә арматура күренә, җылыту коллекторының һәм кайнар су белән тәэмин итү системасының герметиклыгы бозылган, подъездда аз токлы чыбыклар эленеп тора, тротуарда һәм йорт яны территориясенең машина үтә торган өлешендә бозлавык һәм кар.
Директор Административ хокук бозулар турында РФ кодексының 14.1.3 ст. 2 өлеше буенча берничә тапкыр административ җаваплылыкка тартылган булган инде, шуңа күрә штраф күләме акрынлап арта бара. Әгәр хокук бозулар кабатланса, алга таба 100 мең сум штраф һәм, бәлки, дисквалификация дә булырга мөмкин.
Татарстан Торак инспекциясе матбугат хезмәте