Гамәл кылмаган өчен 25 мең
Менделеевск районыннан Татарстан Торак инспекциясенә шикаять килде - Татар Чаллысы авылында Җиңү урамындагы 2 нче йорт ремонтка мохтаҗ. Тышкы яктан йорт, беренче карашка, нык күренә. Әмма фатирларның стеналарында ярыклар бар, фундаменты таркала, түбәсеннән су үтә – гаризада шулай диелә.
Инспектор тикшерү белән урынга чыкты. Барлык фактлар да расланды. Быел биредә фундаментны ремонтларга тиешләр булганнар. Ләкин подрядчы хәтта эшкә керешмәгән дә: проект белән проблема, махсуслаштырылган оешманың бәяләмәсе юк.
Тикшерү вакытында да түбәдән су үтә иде. Идарәче компания башлыгы проблеманы чишү өчен бернәрсә дә эшләмәгән. Нәтиҗәдә 25 000 сум штраф түләячәк: ул административ җаваплылыкка тартылды. Шулай ук хокук бозуларны бетерү турында күрсәтмә дә бирелде. Республиканың Төзелеш министрлыгына капиталь ремонт ясау срокларын киләсе елга күчерү турында хат җибәрелде.
ТР ДТИ матбугат хезмәте