Автокалада көн тәртибе бай булды
«Безнең ишегалды», капиталь ремонт, газ җиһазларына техник хезмәт күрсәтү һәм ТКХ ДМС системасына мәгълүмат кертү – автокалада көн тәртибе бай булды.
Башта Татарстан Торак инспекциясе башлыгы урынбасары Елена Арефьева һәм Тукай районы башкарма комитеты башлыгы Айрат Хәбибуллин авыл җирлекләрендә булып, йортларны төзекләндерү барышын бәяләделәр. Алар Борды авылында барган капиталь ремонт эшләре белән таныштылар һәм узган ел төзекләндерелгән ишегалды территорияләрен карадылар. Круглое Поле бистәсендә алар быел «Безнең ишегалды» программасы буенча төзекләндерү уздырылган ишегалдына бардылар һәм индивидуаль котельныйны карадылар.
Аннары җирле үзидарә органнары вәкилләре, хезмәт күрсәтүче компанияләр һәм идарәче оешмалар җитәкчеләре район башкарма комитетының киңәшмәләр залына җыелып, Елена Арефьева анда киңәшмә үткәрде. Очрашуда республика программасы буенча төзекләндерелгән ишегалларын карап тотуда хокук бозуларга юл куймау, 2024/2025 елгы ягып җылыту сезонына әзерләнүдә хаталардан саклану, капиталь ремонт барышы, шулай ук ТКХ ДМС системасына мәгълүмат урнаштыру турында фикер алыштылар.
ТР ДТИ матбугат хезмәте