Кайнар акчага салкын душ
Күз алдыгызга китерегез: сез кранны рәхәт җылылык көтеп ачасыз, ә аннан бераз җылы су ага. Яр Чаллыдагы 11/09 номерлы йортта яшәүчеләр нәкъ менә шундый проблема белән очрашкан. Даими уңайсызлыктан туеп, алар Татарстанның Торак инспекциясенә мөрәҗәгать иттеләр.
Инспекторлар үлчәүләр үткәргән һәм хокук бозуны ачыклаган: кухняда су +56 градус булган, ә ванна бүлмәсендә - бөтенләй +39,5. Исегезгә төшерәбез, нормативлар буенча кайнар су температурасы 60-75 градус тирәсендә булырга тиеш. Теләсә кайсы якка тайпылышлар куркыныч: артык салкын су бактерияләрнең үрчүенә ярдәм итә, ә артык кайнар су пешү куркынычы тудыра.
Әмма иң мөһиме: кайнар суның температурасы +40 градуска кадәр төшсә, закон буенча ул салкын булып түләнергә тиеш! Бу 11/09 йортта яшәүчеләр тулы күләмдә алмаган хезмәт өчен артык түләгәннәр дигән сүз.
Нәтиҗәдә, кулланучылар хокукларын бозган һәм сыйфатсыз коммуналь хезмәтләр күрсәткән өчен “Ремжилстрой” ИК” ҖЧҖ идарәче компаниясенә 30 мең сум штраф салынган. Бу очрак - үз хокукларыңны белү һәм аларны яклау мөһимлегенең ачык мисалы. Үзегезне алдарга ирек бирмәгез: кайнар су чак кына җылы булса, аның өчен салкын су өчен түләргә сезнең тулы хакыгыз бар.
Әгәр идарәче компания бирә торган су температурасының дөреслегенә шикләнәсез икән, алардан рәсми үлчәүләр үткәрүне таләп итәргә тулы хокукыгыз бар. Бу үлчәүләрдән соң да сораулар калса яки нәтиҗәләр сезне канәгатьләндермәсә дә, киләсе адым - Татарстанның Торак инспекциясенә мөрәҗәгать итү.
Шунысын да билгеләп үтәргә кирәк, Чаллы халкы узган ел буе “Ремжилстрой” эшенә дәгъва белдерде. Татарстан Республикасында Кеше хокуклары буенча вәкаләтле вәкил аппараты мәгълүматларына караганда, әлеге компания хезмәт күрсәтә торган йортларда яшәүчеләр аның эшен нибары 3,87 баллга бәяләгән. Бу республика буенча уртача күрсәткечтән шактый түбән, ул 4,9 балл тәшкил итә. Мондый түбән бәя дәүләт хезмәтләре порталында яшәүчеләр калдырган бәяләмәләрне анализлауга нигезләнгән. 2025 ел нәтиҗәләре буенча “Ремжилстрой” ИК республиканың идарәче компанияләре арасында күрсәтелә торган хезмәтләрнең сыйфаты буенча аутсайдерлар рәтенә керде.
Татарстан Торак инспекциясе матбугат хезмәте