Александр Тыгин: «Татарстанда торак-коммуналь хуҗалыкка инвестицияләр җитди сыйфат бирә, һәм халык моны югары бәяли»
Бүген Дәүләт Советында «ТКХ проблемалары турында» түгәрәк өстәл утырышы узды, анда республиканың Дәүләт торак инспекциясе башлыгы Александр Тыгин катнашты.
Инспекция башлыгы хәбәр иткәнчә, быел рекордлы санда мөрәҗәгать итү күзәтелә: 11 айда инде 22542 мөрәҗәгать. Узган елның шул ук чорында 21 494 булган.
Мөрәҗәгатьләрдә сораулар саны тагын да күбрәк: 35283. Нигездә гомумйорт мөлкәтен карап тоту, торак-коммуналь хезмәтләрнең сыйфаты һәм аларга түләү, идарәче оешмаларның эше, яңадан планлаштыру буенча.
«22 мең мөрәҗәгать – зур сан. Әмма башка төбәкләр белән чагыштырсак, бездә мөрәҗәгатьләр аз. Башкортстан, Кемерово, Түбән Новгород, Самара һәм Свердловск өлкәләре – 40 меңнән артык шикаять, Мәскәү тирәсендә – 100 мең. Бездә миллионлы шәһәр белән Россиянең теләсә кайсы субъектына караганда 2,5 тапкырга кимрәк. Без Татарстанда торак-коммуналь хуҗалыкка инвестицияләрнең җитди сыйфат бирүен һәм халыкның моны югары бәяләвен аңлыйбыз. Капиталь ремонт – 11 миллиардтан артык, «Безнең ишегалды» программасы – ел саен 10 миллиардтан артык. Торак-коммуналь хуҗалыкка бүтән беркайда да дистәләгәнчә миллиард кертелми», - диде Александр Тыгин.
Агымдагы елда 1443 тикшерү үткәрелгән, 3022 хокук бозу очрагы ачыкланган (2024 елда – 2617), 15,5 млн.сумлык штраф билгеләнгән (2024 елда – 12 млн.сум).
Татарстан Торак инспекциясе матбугат хезмәте