Автокалада киләчәкне ничек төзиләр
Агып торган канализация, чүп-чар, юешлек, ватык отмосткалар – күрәсең, автокаланың «Строим будущее» идарәче компаниясендә киләчәкне нәкъ менә шундый итеп күрәләр. Идарәнең килешүен имзалаганда милекчеләр торакчылардан нәкъ менә шуны көткән микән, бик шикле.
Татарстан Торак инспекциясенә 21/32, 21/33 номерлы йортларны карап тотуга шикаятьләр килде. Хокук бозулар күчермә кебек: системалы рәвештә су басу, кипми торган подваллар, һава кертү тәрәзәләре ябык, үтәли җилләтү юк, көнкүреш әйберләре җыелган йортның бөтен периметры буйлап отмостка ватылган, цоколь белән отмостка арасында зур ярыклар бар һ.б.
Йортларның торышы өчен идарәче компаниянең директоры һәм баш инженеры РФ КоАП 14.1.3 ст. 2 өлеше буенча административ җаваплылыкка тартылды. Директорга 50 мең сум, баш инженерга 25 мең сум штраф салынды.
Бозуларны бетерү буенча бирелгән күрсәтмәләр үтәлеше инспекция контролендә. Моннан тыш, сорау бар: «Строим будущее» ИК ҖЧҖ җылыту чорына әзерлек паспортын ничек ала алды икән? Санап үтелгән хокук бозулар 15 сентябрьдән соң (республиканың идарәче компанияләре җылыту чорында әзерлек паспорты алырга тиеш булганда) булырга тиеш түгел. Шуңа да карамастан, бу мираж түгел.
Хокук бозулар күпкә күбрәк булган: йортның виртуаль паспортында исәп алып барылмый.
Исегезгә төшерәбез, торак-коммуналь хуҗалык системасын булдыруның максаты: һәр милекче исәпләүләрнең дөреслегенә ышанычлы булсын өчен үтәкүренмәлелек тудыру. Биналарның гомуми мәйданы, коммуналь хезмәтләргә чыгымнар – барлык мәгълүматлар ачык булырга тиеш. «Строим будущее» ИК август аенда фатирдагы исәпләү приборлары күрсәткечләрен 89% ка гына керткән, ә түләүне исәпләгәндә күрсәткечләрне исәпкә алу өлеше күпкә азрак – нибары 50 %. Сүз уңаеннан, мобиль кушымта аша тапшырылган счетчик күрсәткечләрен исәпкә алу проценты – 0!
Электрон түләү документлары – 82% ы, ягъни 5000нән артык милекче кәгазь һәм виртуаль документларны чагыштырып, шунда ук түли алмый.
Сигез йорт буенча октябрь аенда инженерлык челтәрләренең торышы турында мәгълүмат кертелмәгән. Мисал өчен, "Клевер" ТК йортлары буенча кайнар су белән тәэмин итү һәм җылыту системалары турында билгеле түгел. Кайбер йортлар буенча виртуаль паспортка техник характеристикалар кертелмәгән: торак һәм торак булмаган биналарның гомуми мәйданы, подъездлар һәм лифтлар саны, эчке диварларның тибы турында белешмәләр юк.
64 йортта яшәүчеләр милекчеләрнең читтән торып үткәрелә торган җыелышында катнашу хокукыннан мәхрүм ителгән. Мисал өчен, 21/22 нче йортта – 25 фатир, 21/24 нче йортта 36 фатир Росреестр базасы белән бәйле түгел. 800гә якын фатирның кадастр номерлары торак-коммуналь хуҗалык системасына кертелмәгән. Йортлар исемлеге безнең сайтта урнаштырылган, танышып чыгарга киңәш итәбез.
Һәм тортның чиясе турында – авария-диспетчерлык хезмәтенең телефон номеры белән элемтәгә кереп булмый. Россия Төзелеш министрлыгы боты шалтырата алмады. Ә сез шалтырата алдыгызмы? Безгә шәрехләрдә языгыз: https://t.me/gji_rt.
Татарстан Торак инспекциясе матбугат хезмәте