4 плитка аркасында гомуми җыелышмы?
Идарәче компаниянең законсыз таләбе Татарстан Торак инспекциясенә мөрәҗәгать итү өчен сәбәп булган. Бүген республика башкаласында яшәүче хатын-кыздан шикаять килде.
«Минем тарафтан 2025 елның 26 октябрендә «Открытая Казань» сайтында 3 подъездның 1 катында идән өслегенең бөтенлеге бозылу турында заявка булдырылды (плитка һәм аның астындагы нигез ярылган, барлыгы 4 плитка). Икенче көнне «ЖЭУ «Адмиралтейская слобода» ҖЧҖ һәм «УК «Заречье» ҖЧҖ җаваплары алынды: «Финанслау чыганагын билгеләп, торак милекчеләренең гомуми җыелышы беркетмәсе таләп ителә». Ягъни мин ремонт урынына җавап язуын гына алдым. Гомумйорт мөлкәтен ремонтлау һәм карап тоту өчен ай саен түлим, гомуми файдаланудагы урыннарда, подъезддагы плитканы да кертеп, агымдагы ремонтны башкару бурычы йорт белән идарә итүче оешмага йөкләнә. Сорау: беркетмәнең таләбе ни дәрәҗәдә законлы? 4 плитканы ремонтлау өчен 60 фатирдан имза җыярга кирәкме?» - дип сорый Большая урамындагы 80 нче йортта яшәүче хатын.
Законсыз. Сез 4 плиткага агымдагы ремонт булуында абсолют хаклы. Өстәвенә, аны берсе чатнау белән үк ясарга кирәк булган. Әгәр дә сез, милекчеләр, идән япмасын алмаштырырга теләсәгез, мәсәлән, «мәрмәр» салырга теләсәгез, ул вакытта милекчеләрнең карары һәм финанслау чыганагын билгеләү кирәк.
Хөрмәтле идарәче компанияләр җитәкчеләре, сезгә РФ Хөкүмәтенең 491 номерлы карары белән расланган "Күпфатирлы йортта гомуми милекне тоту кагыйдәләрен" яңадан укырга киңәш итәбез. Сез көн саен йортларны карарга тиеш, һәм әгәр дә бер генә микро-ярык барлыкка килсә дә, соңрак масштаблы ремонт таләп ителмәсен өчен, ремонт ясарга тиешсез.
Мондый җаваплар Татарстан Торак инспекциясенә шикаятьләрнең массакүләм агымының бер сәбәбе дип саныйбыз. Ел башыннан без 20210 шикаять алдык, шуларның яртысыннан артыгы (11812) - казанлылардан.
Большая урамындагы 80 нче йортта яшәүче хатын-кызның мөрәҗәгате буенча тикшерү үткәреләчәк. Идарәче компания җитәкчелегенә, ә бәлки, компаниянең үзенә карата да административ йогынты чаралары кулланылачак. Идән түшәү мәсьәләсенә милекчеләрнең гомуми җыелышыннан башка да әйләнеп кайтачакбыз. Барысы да федераль законнар кысаларында. Тикшерү нәтиҗәләре турында хәбәр итәрбез.
Татарстан Торак инспекциясе матбугат хезмәте