Куркыныч түбәләр: Сарман районында тикшерүләр йомгаклары
Прокуратураның тагын бер материалы торак инспекторлары тарафыннан каралган һәм карар чыгарылган: «Сарман районы» ИК директоры гаепле. Прокуратура торак инспекторлары белән берлектә торак-коммуналь хуҗалык өлкәсендә хокук бозуларны актив ачыклау һәм чикләүне дәвам итә. Җәлил бистәсендә һәм Сарман авылында йорт яны территорияләрен карап тотуга тикшерү үткәрелде. Тикшерү нәтиҗәләре буенча материаллар Татарстан Жилинспекциясендә каралды.
Күп фатирлы алты йорт территориясен тикшерү барышында күп санлы хокук бозулар табылган. Аерым алганда, йортларның түбәсеннән җәяүлеләр өчен куркыныч янаучы кар массалары асылынып тора.
"Сарман районы ИК" ҖЧҖнең лицензияле таләпләрдән тупас рәвештә чигенүләр белән үз эшчәнлеген алып баруы билгеле булды. Ачыкланган хокук бозулар өчен шәхси җаваплылык идарәче оешма җитәкчесенә йөкләнгән, аңа 25 мең сум штраф салынган.
ТР Дәүләт торак инспекциясе матбугат хезмәте