Баулыдагы идарәче компаниягә кар көртләре өчен штраф салынды
Татарстанның торак инспекциясе прокуратурадан “Баулы шәһәре һәм Баулы районы ИК” ҖЧҖ тарафыннан кылынган административ хокук бозуга кагылышлы материаллар алды.
Район прокуратурасы үткәргән тикшерү барышында идарәче компаниянең күпфатирлы йортларны карап тоту өлешендә торак законнары таләпләрен тулысынча үтәмәве ачыкланган. Аерым алганда, сүз йорт яны территорияләрен, тротуарларны һәм юлларны кар көртләреннән һәм бозлардан вакытында чистарту, шулай ук түбәләрне бозлардан җыештыру турында бара.
Йорт янындагы биш территориядә хокук бозулар ачыкланган: Энгельс урамындагы 50 һәм 52 нче йортларда, шулай ук Зиновьев урамындагы 8, 14 һәм 15 нче йортларда. Ишегаллары җыештырылмаган, ә Энгельс урамындагы 50 нче йортның түбәсеннән җәяүлеләр өчен куркыныч булган боз кисәкләре асылынып тора иде.
Тикшерү нәтиҗәләре буенча идарәче компания директоры административ хокук бозуда гаепле дип табылган һәм 50 мең сум күләмендә штрафка тартылган.
Идарәче компания эшенә халык тарафыннан түбән бәя беренче тапкыр гына күзәтелми. Узган ел район халкы Дәүләт хезмәтләре порталында һәм “ТР Хезмәтләре” мобиль кушымтасында ризасызлык белдерде. Татарстан Республикасында Кеше хокуклары буенча вәкаләтле вәкил аппараты үткәргән анализ буенча, идарәче компанияләрнең 2025 елдагы эшенә уртача бәя 4,09 балл тәшкил иткән, шул ук вакытта Баулы компаниясе 3,84 балл гына алган.
Бу компания белән идарә итү килешүегез бармы? Комментарийларда тәэсирләрегез белән уртаклашыгыз https://t.me/gji_rt.
Татарстан Торак инспекциясе матбугат хезмәте