Суд идарәче компанияне Әгерҗедәге йортны ремонтларга йөкләде
Әгерҗе шәһәренең җәмәгать суды “СМП-184 “ИК” ҖЧҖ идарәче компаниясен Пушкин урамындагы 5 нче йортта ремонт ясарга мәҗбүр итеп, Татарстан торак инспекциясе файдасына карар чыгарды.
Узган елның августында ук күзәтчелек органы хезмәткәрләре йортны карап тотуда кайбер хокук бозуларны ачыклаган һәм аларны бетерүгә күрсәтмә биргән. Алар арасында: подвалны суырту һәм киптерү, шулай ук аны су басу сәбәпләрен ачыклау һәм бетерү; подвалны чүп-чардан чистарту; яктырту системасын ремонтлау; өченче подъездда электр үткәргечләрен һәм аз агып торган кабельләрне тәртипкә китерү; подъездларда күгәрекне бетерү; өченче подъездда керү төркемен ремонтлау; подвалга төшү диварларындагы штукатурканы торгызу һ.б.
Идарәче компания директоры суд утырышында үз гаебен танымады. Ул барлык кирәкле эшләрнең капиталь ремонт программасы кысаларында башкарылырга тиешлеген һәм йортның республика программасына кертелүен ассызыклады.
Әмма суд йортның инде күп еллар тузган хәлдә булуын исәпкә алды. Мондый очракларда идарәче компания агымдагы ремонт үткәрергә тиеш, аңа милекчеләр ай саен түләүләр кертә.
Йортта яшәүчеләрнең берсе подвалны су басу проблемасы ун елдан артык булуын раслады. Торакчылар һәрвакыт суны суыртканнар һәм грунт дәрәҗәсен күтәргәннәр, ә подвалны яңадан су баскан.
Эш материалларын карау нәтиҗәләре буенча, суд “СМП-184” ИК” ҖЧҖне РФ КоАП 19.5 маддәсенең 24 өлеше буенча административ хокук бозуда гаепле дип тапты. Идарәче компаниягә 100 мең сум күләмендә штраф билгеләнгән. Торак инспекциясенең күрсәтмәсе үз көчендә кала, һәм компания күрсәтелгән барлык ремонт эшләрен башкарырга тиеш.
Татарстан Торак инспекциясе матбугат хезмәте