Атна нәтиҗәләре
Бер атна эчендә торак инспекторлары 70 күпфатирлы йортны тикшерделәр, 74 хокук бозу очрагын ачыкладылар, шуларның 49ы – ягу чорына әзерлек буенча. Мәсәлән, Чаллы шәһәрендә 19/2, 19/3 номерлы йортларда. Идарәче компания – «Жилкомбыт-Сервис». Кышкы шартларда файдалануга әзерлек паспортлары торак-коммуналь хуҗалык системасында урнаштырылган, ягъни йортлар җылылык җибәрергә әзер. Ләкин инспекторлар тарафыннан уздырылган тикшерү вакытында 19/2 номерлы йортта подвалны су баскан, ул яктыртылмый һәм чүп-чар белән тулган. 19/3 номерлы йортның отмосткасы, цоколе җимерелгән, подвал һәм чорма чүпләнгән һ.б. Идарәче компаниянең баш инженеры административ җаваплылыкка тартылды һәм 25 мең сумлык штраф салынды.
Әлмәт шәһәренең Ленин урамындагы 195 нче йортта шулай ук әзерлек паспорты булганда юл куелмаска тиешле хокук бозулар ачыкланды: подвалда чүп-чар, канализация кабыклары һәм юешлек, җылыту һәм су белән тәэмин итү торбалары күгәргән. «Комфорт» идарәче компаниясенә ай ахырына кадәр барлык хокук бозуларны бетерү турында күрсәтмә бирелде. Административ хокук бозу турындагы эш карала.
133 кисәтү белдерелде, шуларның берсе «Әйбәт» идарәче компаниясенә. Директорга кайнар су белән тәэмин итү хезмәтен җиткермәгән өчен түбәнкамалыларга яңадан исәп-хисап ясарга кирәклеге турында искәрттеләр. Инспекция Түбән Кама шәһәрендәге 43 йортта су белән тәэмин итүне чикләү срокларының артуын теркәде.
Социаль челтәрләрдәге мөрәҗәгатьләр дә кисәтү өчен сәбәп була ала. «Вконтакте»дагы Татарстан Торак инспекциясе бергәлегендә Бөгелмә шәһәренең Сельхозтехника урамындагы 2,2 а,3,4 нче йортларда яшәүчеләр контейнер мәйданчыгының торышына зарландылар. «Антей» идарәче компаниясенә мәҗбүри таләпләрне бозуның ярамавы турында кисәтү белдерелде.
Бер атна эчендә 301 мең сумлык 10 административ штраф билгеләнде. Шуларның берсе Түбән Кама шәһәрендә Химиклар проспекты буенча 45 нче йорттагы фатирда яңадан планлаштыру өчен. Милекче ванна һәм бәдрәфне берләштергән, вентиляция тартмасын сүткән. 2 мең сумлык штраф җәзасы яңадан планлаштыруны санкцияләми, тикшерүләр башкарма комитетта дәвам итәчәк.
Татарстан Торак инспекциясе матбугат хезмәте