Газ колонкалары белән бәйле вәзгыять буенча
Казанда, элеккечә, 48 йортта газ колонкалары сүндерелгән, әмма фатирлар саны кимегән. Чкалов урамындагы 15нче йортта 35 фатирның 16сында су җылытыла. Калганнарында төтен чыгару юллыгының герметик булмавы белән проблема әле хәл ителмәгән. Күршедәге 1 нче йортта – 2 фатир, 10 нчы йортта 3 фатир тоташтырылган. Бүгенгә барлыгы 2079 гаилә кайнар сусыз утыра.
Татарстанның Торак инспекциясенә колонкаларны газдан өзүгә карата 63 шикаять килде.
Татарстан Торак инспекциясенең моңа бәйле рәвештә йорт эчендәге һәм фатирдагы газ белән тәэмин итү җайланмаларына, гомумән, гомумйорт мөлкәтенә хезмәт күрсәтү белән шөгыльләнүчеләргә карата ике соравы бар:
- төтен чыгару юллары һәм ветканаллар, ягъни гомумйорт милке ни өчен шундый хәлгә җиткерелгән;
- кайнар су белән тәэмин итү хезмәте кайчан барлыкка киләчәк.
Авиатөзелеш, Мәскәү һәм Киров районнарының идарәче компанияләренә карата тикшерү үткәрелә. Директорларга карата РФ КоАП 14.1.3 ст. 2 өлеше буенча административ хокук бозулар турында беркетмәләр төзеләчәк.
Тикшерүләр дәвам итә. Нәтиҗәләр турында мәгълүмат ресурсларында хәбәр итәрбез.
Татарстан Торак инспекциясе матбугат хезмәте