Түбәнкамалыларга су өчен акчаны кире кайтарачаклар
Бер атна эчендә Түбән Кама районында магистраль торбаүткәргечләрдә 52 авария булган. 172 күпфатирлы йортта яшәүчеләр озак вакытка сусыз калган.
Бары тик 12 авария генә оператив рәвештә төзәтелгән. Исегезгә төшерәбез, су бирүне өзүнең рөхсәт ителгән дәвамлылыгы 1 ай дәвамында 8 сәгать (суммар рәвештә) һәм берьюлы 4 сәгать тәшкил итә, кайнар су белән тәэмин итүнең тупик магистралендә авария булганда – 24 сәгать рәттән. Нәтиҗәләрне бетерүнең иң озак срогы Түбән Камада – 36 көн.
Районның идарәче компанияләренә торак-коммуналь хезмәтләрне тиешенчә күрсәтмәгән өчен түләү күләмен 354 номерлы Кагыйдәләргә туры китерү турында 14 кисәтү белдерелде. Ягъни Татарстан Торак инспекциясе идарәче компанияләрне яңадан исәп-хисап ясарга мәҗбүр итте.
Май аенда шундый ук хокук бозулар өчен түбәнкамалыларга торак-коммуналь хезмәтләр өчен артык исәпләнгән түләү 530 мең сумнан артыграк күләмдә яңадан исәпләнгән (кире кайтарылган).
Татарстан Торак инспекциясе матбугат хезмәте